الطلبات الغير عادية للتوانسة في وسط الطيارة

 

نعطيوكم مقتطفات صغار عطاوهملنا العاملين في شركات الطيران الّي يتعاملو مع التوانسة. شهاداتهم يضحكو، لمّوهم على مرور السنين وقت رحلات المشي و الجيْ على تونس.

 

.مرا كبيرة ركبت في رحلة ما بين باريس و تونس تتشكى من سخانة الطيارة و طلبت من المضيفة بش تحللها الشباك بش تتنفس شوية.

. في رحلة ما بين بروكسل و تونس، واحد “بزناس” ما فيبالوش الّي ما فماش ريزو تيليكوم في الطيارات، طلب من المضيفة بش تكلمو بش يلقى تاليفونو.

. راجل كبير طلع على متن رحلة تابعة الخطوط الفرنسية من باريس لجربة شد ثنية التوالات و طلب من المضيفة بش ما تخلّي حد يدخل حتى يكمل يصلّي. ياخي المضيفة قاتلو الّي البلاصة صغيرة و ما ينجمش يثني فيها ركايبو و ما ينجمش يصلي في الظروف الملائمة. موش مشكل، الراجل لقى الحل و طلب منها كان ينجم يصلي في بيت الطيار!

. راجل عمرو في الأربعين، وقتلي جا يشري في تساكر الطيارة بش يسافر من باريس لتونس أصر على أن مرتو كونها قصيرة تسافر على ركايبها بش هكاكا سو التسكرة ينقص. قدام قلق وضجة الخدامة، أصر و وضلهم الّي هو و مرتو في الدار مستانسين يقعدو على ركايبهم في الدار!

. رغم الإعلان الخاص بالأمن الّي ينص على منع التدخين في وسط الطيارة، واحد مدمن على التدخين أصر على أنه المضيفين يجيبولو صندرية. وقتلّي المضيفة رفضت، الراجل تغشش برشا و يحلف الّي عندو سنين يركب في الطيارات و أول مرّة يمنعوه بش يتكيف.

. على متن رحلة تابعة للخطوط التونسية ما بين ميلان و تونس، مرا كبيرة خافت و قتلّي المضيفين وراو طرق الأمان الّي تستعمل كان صارت حاجة، مشى في بالها في بالها الّي الطيارة قاعدة تتكسر. هذا تطلب تدخل العاملين و برشا مسافرين ( منهم طبيب) بش يريضوها و يرجعوها لكرسيها.

. راجل كبير على متن رحلة ما بين ميلان و جربة، وقتلي الطيارة تعدات ببلاصة فيها اضطرابات قوية، اصر على انّه المضيفة تلقالو فورا إمام و كتاب قرآن.

. مرا، ظاهر فينا أول مرة تسافر، طلبت من المضيفة كان يعملوش عليها مزية و الطيارة تهبطها في القيروان بحذا دارها.

. على متن رحلة تونس-سترازبورغ، مرا كبيرة اصرت على المضيفة بش تحللها المل الكبييير متع الطيارة و الطيارة تطير خاطرها نسات دواها في الفاليجة.

 

contact

 

. مسافر درجة أولى على متن رحلة ليون-منستير، انبهر بزين وحدة من المضيفات و أصر على أنها تمشي معاه بش تقابل أمه الّي تستنى فيه في المطار.

. في المجلة الّي فيها الحاجات الّي يتباعو في الطيارة، راجل كبير تشكّى من غياب المنتوجات التونسية. تغشش و قال الّي لازم على الأقل التمر و الزيتون يكونو موجودين!

مسافر ما عادش عندو فلوس مسافر من تونس، طلب من عون يخدم في الخطوط التونسية انه يعديلو البافاج الزايد مقابل باكو مارلبورو.

. على متن رحلة روما-تونس، وقتلي أحد المضيفات تكلمت غي الميكرو بش تشوف فماش طبيب في الطيارة بش يسعف واحد من المسافرين، خمسين واحد قامو بش يشوفو شفمّا. شطر المسافرين طلعو مروحين من ندوة طبية في ايطاليا!

. من أكثر الحاجات الغير عادية الّي يجيبوها المسافرين بش يسجلوها مع الباقاج: موتور قديم، قاز، دبوزة قاز، باب، محور كرهبة، علوش مكنجل…

Commentaires