شوية ضمار : قانون الطرقات على الطريقة التونسية

قانون الطرقات تونس

Lire l’article en Français

أيّا يا سيدك بن سيدك، أول و أهم صدمة ثقافية تعرضك كي تجي لتونس هي : قانون الطرقات. باش ما تنفعلش و دمّك ما يولّيش يغلي و تقعد تشوف و تتمتع بمفاتن البلاد, نفكروك بأهم قانون الطرقات على الطريقة التونسية.

1. لازمك تحط في بالك إلّي الكيّاس حاجة ملك الناس الكل و الأهم أنها محلولة للناس الكل : أبدا مالكرّيطة و انت ماشي، نلقاو زادا الكراهب الخردة إلّي عمرهم فايت 30 سنة، تلقى زادا البيّاعة متع البنزين و بطبيعة الحال تلقى كراسي و طواول القهاوي منَشرة حتى في وسط الكيّاس… حاسيلو ساعات صدفة أهوكَ تلقى الكراهب العاديين إلي مخلصين معلوم الجولان و الفيزيتا.

2. الأولوية عاللّمين : لازمك تعرف إلّي في تونس ما فمّاش أولويّة خاطر لولاني إلّي يجي من اليمين ولاّ اليسار ولاّ كان جات كار ولاّ كرهبة كبيرة، أعرف إلّي راهي بش تتعدّا قبلك. كان قعدت تخمم شكون أكبر انت ولاّ الكرهبة الأخرى، العنيف أكثر هو الّي يتعدّى.

3. لازمك تحترم و في جميع الحالات نظام أولويّات العربات ( من الأكثر إلى الأقل أولوية بالطبيعة ) : المراسم و القوافل الرسمية، كراهب البوليسيّة، العربات الصفر ( تاكسي، تاكسي جماعي و الكار)، الكماين، أي عربة كبيرة و بعد فللّخر كان نجمت تعدّى انت. لازمك تحط في بالك إلّي سيّارات الإسعاف عمرهم ما كانوا أصحاب أولوية. في الريف، أولوية اللّواج تجي بالضبط بعد كراهب البوليسية.
4. كان الدنيا معبية و زحمة ( و حتى كان موش زحمة)، المترجلين ما عندهمش الأولوية.
5. ما تمشيش قريب برشا من التكسيات و الكيران و رد بالك و أحرص بش تخلّي بينك و بينهم على الأقل 5 ميترو.

6. استعمال الأضواء الأربعة و الكلينيوتون ما نستعملوهم كان في المواكب الرسمية و العروسات… إحصائيّا، 9 كراهب على 10 كي يجيو يدورو على اليمين ولاّ على اليسار ما يشعلوش الكلينيوتون.

7. الضوء الاخضر و الضوء الأحمر ( مهما كان فما ولاّ ما فماش بوليس قريب) ما يشعوا كان شكلياّ. كان عندك موعد مع صحابك في القهوة بش تعملوا شيشة، أحرق الضوء و ما يهمك في شيء.

8. كانك تسوق و الدنيا سخونة تشوي ولاّ تسوق في الليل ولاّ في رمضان… الضوء الكل أخضر ولاّ أحمر، البلايك متع “قف” ولاّ متع ” خلّي الأولوية” ولاّ حتى متع ” الخطر ” أنساهم جملة.
9.  رد بالك!! علامات تخفيض السرعة مانستعملوهمش كيما في اوروبا. في تونس، لازمك تفهم إلّي العلامة لازمك تقراها ” فوت السرعة المحدّدة” موش ” طيّح في السرعة المكتوبة و ما تفوتهاش

10. كانك ناوي ادّوبل على حد ( بالطبيعة يحبّذ أنّك دوبل عاللّيمين بش ما تفاجأش إلّي يسوق وراك)، زمّر برشا مرات بش تفيّق إلّي يسوق

11. الفايسبوك حاجة مقدسة في تونس. في الكرهبة، حد ما ينحي التاليفون من يدّو! كانك قدّامك كرهبة تزقزق و تمشي 20كم/س على طريق إلّي مالمفروض أنها تكون سريعة، أعرف الي لي يسوق  يجاوب على مساج ولّا يعمل في تصويرة… زمّر بالسياسة و دوبل عليه و اطلب السماح خاطرك قلّقتو… رد بالك لا تقلق السائق، راهو أي عاجة تعطل استعمال الفايسبوك في تونس يعاقبو عليها بخطية و أشهرة حبس.

12. كي يبدا الضوء أحمر، أعمل كيما الناس الكل، زمّر قبل ما يولّي أخضر

13. في اللّيل، شعل ضوء كرهبتك “فار” بش تبهر الناس إلّي جايين و بش يخلّيولك الكيّاس واسع و عريض

14. في تونس تنجم توقف كرهبتك وين تحب، قدام باب قاراج، فوق المادّة، في صف ثالث، قدام ثكنة متع رجال الإطفاء

15. كان صارت حاجة لكرهبتك و طاحت “بان”، رد بالك تنقلها ,  صلّحها غادي عالبلاصا و عطّل الكراهب الكل و أعمل الزحمة

16. في المدينة ولاّ في الريف، “الدودانات” عملوهم بش نتفاداوهم و ما نتعدّاوش فوقهم، امشي عاللّيمين ولاّ عاللّيسار من غير ما تنقص في السرعة

سمير بوزيدي

إشترك في صفحتنا على الفيسبوك

Commentaires