1 – الكسكسي

الكسكسي كي الملح الي ما يغيب على طعام يختلف من جهة لأخرى لكن المطعم والبنة وحدة بالقرنيط، بالفاكية، بالبرزقان، بالمرقة الصفاقسية، بالرغيدة، مسفوف والا بالخضرة، يشتهاه لكبير والصغير، خصوصا من يدين الميمة بعد طول مدة كي تروح لتونس وتشم ريحتو البنينة مع كاس لبن معند لبان الحومة.  

2-السلاطة المشوية

ماكلة متسمية على الصيف ولمة العائلة مع طريح مشوي تنسيك هم الغربة وسنينها على فحمات جمر لاهبين وريحة الفلفل والطماطم عاملة مسد وإنتي تمروح على الفحمات وحس مهراس الميمة عامل رنة في الودنين محرحرة تعمل 66 كيف مع زيت زيتونة نضوح يرد الروح ورشة تن وخبز كوشة عمك سلومة بالسينوج يزيدها بنة على بنة جو ما تلقاه كان في تونس والصيف ما يتعدى كان بيها.

3-الكفتاجي

كي نقولو تونس نقولو كفتاجي نقولو قيروان نقولو عمك الحطاب نقولو ونقولو، الكفتاجي التونسي من أعظم الأكلات التونسية وأكثرها استهلاك وبنتوما كيفها حد قرين فلفل كعيبة طماطم عظيمة وبرشا قرع أحمر وفريت لكلهم في صحين وزيدهم زيت الزيت الزيتونة و رشة البصل و المعدنوس مشهد يتكلم وحدو يخليك تنادي بالمطار طاير لتونس علاش ؟ على صحين كفتاجي

4 – المقلي

الراعي الرسمي لصيف الصيف منغيرو ما يتسماش صيف والخلاعة مع العايلة متكون كان بيه خف لف , كيف تلمو في دار العيلة فرحانين برجوع العزاز علينا في الصيفية تش تش فلفل و طماطم وفريت و عظمة و خبزة ملاوي و المطعم وحدو يتكلم زيدهم معاه قازوزة باردة شي ما تلقاه كان في تونس كي تدور العالم و تفطر في أحسن المطاعم بلادك ديما بخيراتها تمتعك.

5- الفريكاسي

الفريكاسي والصيف زوز حاجات يذكرونا بتونس وريحت بحرها خاطر كي نقولو فريكاسي نقولو صيف ونقولو بحر ونقولو صغرنا والمرسى والصفصاف والخلاعة مع العيلة فريكاسي وزيت يتشتش بطاطا وهريسة وعظم مسموط والتن يغطيها مع الهريسة من فوق حاجة تشهي وريحة بنينة توصلك حتى من وراء البحر.

إقرأ أيضاً : التونسي بالخارج بين مطرقة الإغتراب و سندان الكورونا

إشترك في صفحتنا على الفيسبوك