نشر النائب بمجلس نواب الشعب ياسين العياري اليوم ,الثلاثاء 06 جويلية 2021, تدوينة قال خلالها أنه قام بإيداع مقترحات قوانين تتعلق بالبيتكوين، بايبال و منع إهدار و تبذير المواد الغذائية وهذا ما جاء في نص التدوينة

تم اليوم و لله الحمد، إيداع زوز مقترحات قوانين بعد النجاح في جمع النصاب القانوني اللازم، شنوما الزوز مقترحات هاذم؟ المقترح الأول يتعلق بتنقيح مجلة الصرف و فيه زوز أجزاء، نحاول نلخصهم

 الجزء الاول يسمح للتونسي المقيم في تونس إنه بالبطاقة البنكية التونسية يشري بالعملة الصعبة من الخارج في حدود المنحة السياحية (6000 دينار) و إذا باع منتوجات أو خبرات أو ربح في تداول عملات رقمية أو غيرها، من حقه يخلي ربحه بالعملة الأجنبية و يتصرف فيه كيما يحب

 الجزء الثاني يهم العملات الرقمية، بيتكوين و غيرها، تقنين تعدينها نعتقد إنه المقترح هذا بجزئيه، بش يحل آفاق حقيقية للشباب التونسي

المقترح الثاني يتعلق بمنع إهدار المواد الغذائية في النزل و المطاعم و المساحات الكبرى، إنعكاساته بيئية، على قفة المواطن و على صندوق الدعم

صحيح هي مقترحات كتبتها و خدمتها أمل و عمل، لكن عمرها ما كانت توصل مقترحات قوانين لولا السيدات و السادة الزملاء الي صححو معانا عليها حتى تبلغ النصاب القانوني فألف ألف ألف شكر لهم جميعا و نتمنى تتواصل الشراكة لين تصدر هذه القوانين في الرائد الرسمي

هذه المقترحات هي إجتهاد بشري على قد إمكانياتنا، أكيد فيها ما يتحسن، لو عندكم تصليح، ملاحظات، مقترحات، شكلا و مضمونا، نكون سعداء بالتعاون معاكم لتحسينها، بصفتنا جهة مبادرة.

يزينا م الحديث على ال paypal و ال bitcoin و صندوق الدعم و الحفاظ على البيئة، اليوم ثمة مقترحات قوانين جدية في المجلس، فلنتعاون عليها جميعا، حتى نترك أثرا في واقعنا. ثمة زوز مقترحات قوانين يبدو أننا سنتخلى عنها و نصرف عنها النظر، رغم إنا كتبناها و جاهزة، و السبب عدم تحمس الزملاء لها (يلزم 10 نواب على الأقل يمضيو على المقترح و أمل و عمل عندها نائب واحد) و هي

تقنين القنب الهندي

 الحصص عند مختص نفسي الإجبارية للمقبلين على الزواج + الطلاق بالتراضي حين غياب التنازع و المحضون يصبح أمام عدل إشهاد لا جلسات لا محاكم

و هكة يقعد عندنا مقترح واحد أخير للسنة النيابية هذه، جاهز، سنقدمه بإذن الله بالتفصيل في الأيام القليلة المقبلة و متأكدين ستعارضه أغلب السفارات الأجنبية

ملخصه : يمنع على تونس إنها تتسلم شخص حارق أو غيره مرحل قسرا دون رضاه، الأمر صعيب و تقني و سنعود له قريبا..