دبارة تونسية : روز جربي بالقرنيط
ماكلتنا التونسية الزمنية بنينة و مشتهية بتفويحاتها إلي من قديم الزمان كانوا جدودنا يحضروهم كل صيفية من التابل و الكروية للفلفل الشايح للنعناع وقشور الرمان و القارص و الكليل و الزعتر و الهروس و القايمة طويلة .
ليوم إخترنا في "دبارة تونسية" باش نحكيو على "الروز الجربي بالقرنيط " الطبق المشهور من الشمال للجنوب وإلي متسمي على جزيرة جربة التونسية الشهيرة ، طبق خفيف يتماشى مع الفصول الكل مغذي للكبار و الصغار بإعتبارو يتكون من عناصر متكاملة كيما السلق والسبناخ والسفنارية والجلبانة والقرنيط وزيت الزيتونة .
المقادير
باش نحضرو الطبق لبنين هذا ل 6 أشخاص نستحقو:
- 300غ قرنيط
- 500 غ روز أصفر
- 3 كعبات سفنارية
- 100 غ جلبانة
- قتة سلق
- 500 غ سبناخ
- 50 غ هريسة عربي
- مغرفة ونص طماطم معجونة
- نص مغرفة كبيرة ملح
- مغرفة صغيرة تابل وكروية (تفويحة مشكلة)
- 3 فصوص ثوم مهرسين
- مغرفة صغيرة كركم
- مغرفة صغيرة فلفل أكحل
- كاس صغير زيت زيتونة
- نعناع شايح
طريقة التحضير
نحضرو القرنيط :
ناخذو طنجرة نحطو فيها ماء سخون و رشة ملح صغيرة و رشة فلفل اكحل وعصرة قارص ونخليو القرنيط متاعنا يغلي مدة 10 دقيقة على نار متوسطة لين يطرا شوية ، منحبهوش يطيب برشة خاطر بش يزيد يطيب مع الروز بالبخار.
في الوقت إلي يطيب فيه القرنيط شنية نعملوا ؟
نستغلو الوقت إلي يطيب فيه القرنيط ونقص لخضرة متاعنا ناخذو قتة السلق و 500 غ سبناخ ونقصوهم بحجم متوسط ونغسلوهم بالباهي ، بعد نقصو السفنارية متاعنا و ناخذو صحفة كبيرة ونحطو لخضرة متاعنا إلي قصيناها نزيدها المكونات إلي بقات، 100 غ جلبانة، 50 غ هريسة عربي ، مغرفة ونص طماطم معجونة ، نص مغرفة كبيرة ملح ، مغرفة صغيرة تابل وكروية (تفويحة مشكلة)، 3 فصوص ثوم مهرسين ،مغرفة صغيرة كركم مغرفة صغيرة فلفل أكحل ، و النعناع شايح ، لهنا يكون القرنيط شد روحو نخرجوه حتى هو ونقصوه طروف متوسطين ونظيفوه للخليط.
نخلط المكونات الكل في بعضهم وناخذو كسكاس ومقفول نحطو ماء في المقفول نستناوه لين يغلي ونفرغو كل شي في الكسكاس متاعنا ونحطوه فوق المقفول ونغطيوه ونخليوه يفور لمدة 45 دقيقة على نار متوسطة و مننساوش باش نحركوه كل 15 دقيقة .
بعد 45 دقيقة ..
بعد 45 دقيقة نهبطو الروز متاعنا ونفرغو في صحفة ونصب عليه كاس زيت زيتونة متاعنا بش يتحل ويجي راوي نجمو نزيدو معاه كعبة زيتون و علاش لا فلفل مسير .وتاكلوا صحة وبشفاء
