ماكلتنا التونسية الزمنية بنينة و مشتهية بتفويحاتها  إلي من قديم الزمان كانوا جدودنا يحضروهم كل صيفية من التابل و الكروية للفلفل الشايح للنعناع وقشور الرمان و القارص و الكليل و الزعتر و و الهروس و القايمة طويلة .

ليوم إخترنا باش نحكيو على "الحسو بالكعابر "، طبق شتوي بالأساس يدفي و يشبع مع مكوناتو المغذية كيما كعابر اللحم المفروم ، نجموا ناكلوه كطبق منفرد ولا يكون في شكل مفتحات تكون مرافقة مع بريكة بنينة ولا سلاطة .

المقادير

باش نحضرو الطبق لبنين هذا نستحقو:

للحم المفروم :

• 300غ لحم مفروم
• مغرفة صغيرة ملح
• مغرفة صغيرة تابل وكروية (تفويحة مشكلة)
• 2 فصوص ثوم مهرسين
• مغرفة صغيرة كركم

للحسو :

• مغرفة هريسة عربي
• 5 مغارف كبار زيت زيتونة
• 1 مغرفة كبيرة طماطم معجونة
• 3 فصوص ثوم مهرسين
• مغرفتين فارينة
• ليمونة
• نصف مغرفة كبيرة نعناع
• مغرفة صغيرة فلفل أكحل
• مغرفة صغيرة هروس
• كعبات كبار

طريقة التحضير

باش نحضر الطبق هذا على زوز مراحل:

نحضرو الكعابر متع اللحم المفروم :

ناخذو 300غ لحم مفروم نحطوهم في صحفة ونبداو نفوحوا فيهم ، نحطو مغرفة صغيرة ملح ، 2 فصوص ثوم مهرسين ، مغرفة صغيرة تابل وكروية ، مع مغرفة صغيرة كركم ونخلطو المكونات لكل في بعضهم

بعد منخلطوا المكونات بالباهي نبداو نعملوا في كعابر اللحم المفروم و لهنا "Astuce" كيف نجيو نعملوا الكعابر لازم نبلوا يدينا بشوية زيت باش ميلسقوش في يدينا .

بالنسبة ل Sauce لحسو :

في طنجرة نحطوا 5 مغارف كبار زيت زيتونة نخليوهم يسخنوا ونحطوا الكعابر يتقلاو شوية وبعد نحيوهم و نخيلو الزيت نفسو ونحطوا مغرفة كبيرة طماطم معجونة ومغرفة كبيرة هريسة عربي ونزيدوهم نص ليترا ما سخووون ، نفوحوهم بمغرفة صغيرة ملح، مغرفة صغيرة كركم ، مغرفة صغيرة تابل و كروية ، مغرفة صغيرة فلفل أكحل.

نخليوها تغلي نصيف ساعة ، وبعد نزيدوا 3 فصوص ثوم مهرسين و الكعابر إلي حضرناهم.

في كاس ما نحطوا مغرفتين فارينة ونحركوهم باش نزيدوهم للـsauce باش تجي عاقدة شوية ولهنا الفارينة بعد منحلها في الماء بالباهي نصفيوها وقت نجيو نصبوها في لحسو.

كي تبقبق نزيدو شوية ليمون و نصف مغرفة كبيرة نعناع ومغرفة صغيرة هروس شايح شوية كبار ونطفيو عليها و تغطيوها 3 دقايق .

وتاكلوا صحة وبشفاء