10 أخطاء يجب تجنبها أثناء تحضير حقيبة سفرك إلى تونس !

10 أخطاء يجب تجنبها أثناء تحضير حقيبة سفرك إلى تونس !

Alloblediالخميس 11 نوفمبر 2021 - 09:37

السفر بشكل عام مهما كانت الوجهة أو الهدف متاعو تجربة فريدة وخاصة،.. لكن التحضير للسفر في العادة مايكونش بنفس القدر مالمتعة خاصة كيف تكثر الاجراءات والمراحل اللي تسبق توجهك للمطار, واللي من أهمها حزم الأمتعة وتحضير الحقيبة اللي باش ترافقك في رحلتك.

لذلك كانك تونسي وتستعد لرحلتك وانت جاي لبلادك باش نحاولو نرافقوك في المرحلة هاذي ونمدوك بنصائح تنجم تفيدك وتتفادى من خلالهم انك تنسى حاجة وانت تجهز في حقيبة السفر متاعك. وهذي أغلب الأخطاء الشائعة اللي ينجم أي مسافر ياقع فيها أثناء الاستعداد:


1- ماتجمعش أوراقك وأغراضك الخاصة في حقيبة صغيرة .. !

اذا كان تعرف الأمور تنجم تصعب عليك في علاقة بالأوراق والمستندات الضرورية في رحلتك، استعمل حقيبة صغيرة لأهم الأوراق اللي مرتبطة بالهوية متاعك والا معاملاتك اليومية. كيما البطاقات والا جواز السفر والوثائق الصحية. باش ماتلقاش روحك مضطر انك تعاود تحل الحقيبة متاعك بعد مانظمتها وسكرتها.

 



 هكا تكون سهلت على روحك عملية التثبت داخل المطار وربحت روحك برشا وقت. كيما تنجم تحط فيها المبلغ المالي اللي باش تهزو معاك واللي مالمستحسن مايكونش كبير وتنجم تحملو معاك في الحقيبة الصغيرة. اذا كان عندك حاجات تستعملهم بشكل منتظم وتنجم ماتلقاهمش في تونس. ماتنساش باش تخصصلهم مكان، مثال نوع الشاحن اللي تستعملو والا دواء تاخذو بصفة منتظمة ومايكونش متوفر في البلاصة اللي انت متوجهلها.

2- تنسى الوثائق الصحية  .. 

في ظل الوضع الصحي الصعيب اللّي عاشو العالم الكل منذ انتشار فيروس كورونا ومع مافرضتو الدول من بروتوكولات واجراءات مشددة على المسافرين, أصبح من الضروري أنو نذكرو بأهمية تفقد كل الوثائق الصحية الأساسية لقبول أي مسافر.
 


وبعد ما تطلّع على القرارات المحيّنة اللي فرضتها البلاد اللي انت متوجهلها، في ما يخص اجراءات السفر، تجمع كل الوثائق اللازمة وتتأكد من انك ما أهملت حتى مرحلة وما نسيت حتى ورقة قبل ما توصل للمطار,بهذا تجنب
روحك الوقوع في اشكاليات قانونية تنجم تضيّع عليك الرحلة .. 

3- تخلي روحك لاخر وقت ..

حزم الأمتعة في اخر وقت ينجم يخلقلك نوع من الضغط اللي يخليك ساعات تهز برشا حاجات دون داعي وماتكونش ضرورية في الرحلة متاعك، لذلك من الأفضل انو تحضر الأمتعة متاعك قبل السفر حتى بأيام.
 


هذا زادة ينجم يوفرلك أكثر وقت اللي تنجم تحدد فيه شنوة تستحق واللي يلزمك بالضبط وتختار بالصحيح الملابس والأحذية والمعدات الضرورية لمشوارك.

4- ماتستعملش قائمة: 

الأكيد أنو العديد مالتوانسة يستغناو على المرحلة هاذي ويراو انهم قادرين ما ينساو شي .. ولكن تحديد قائمة في الأولويات وتعيين الأمتعة وقتلي تبدا تحضر في الحقيبة متاعك أمر مهم .. 
 


القائمة تساعدك في تحديد الأشياء اللي باش تهزها معاك  .. أما ماتنساش زادة باش تخليها في وسط الحقيبة بعد ماتكمل لأنو مازلت باش تستحقلها ومن خلالها تتفقد الأمتعة متاعك وتتأكد انك مانسيت شي وانت راجع ..

5- ما تحطش دبشك بالطريقة الصحيحة : 

بما انها المرحلة الاولى إلي تبدى بيها وأنت تحضر في حقيبة السفر متاعك قبل ما تشد ثنيتك ، فتفاصيل صغيرة اتباعهم ممكن يربحك مساحة أكبر، ويخليك تنجم تهز أكثر عدد ممكن مالحاجات إلي تستحقها.  
 


إذا كان عندك مشكلة مع طي وتنظيم الملابس بالطريقة الصحيحة، فنتصور إنو السفر هو الفرصة المناسبة ليك باش تتعلم الحاجة هذي .. انك تحط دبشك كيما يلزم داخل الحقيبة بعد ما حددت بالضبط إلي حاجتك بيه وشنوا برنامجك كي تروح .. أمر ضروري بالنسبة لكل مسافر يحب يهز معاه برشة دبش، وخاصة كي يبدا تونسي ويحب يفرح بالعائلة معاه .. 

6- تجنب الأمتعة الثقيلة: 

انو عرفت تنظم دبشك ووفرت مساحة أكبر مايعنيش انو باش تتجنب الوقوع في مشكلة الوزن الزائد للحقيبة، في الحالة هاذي ،حاول تفادى انك تحط حاجة ماتكونش ضرورية وفي نفس الوقت وزنها  كبير .. وقتها تضمن انو وزن الحقائب متاعك في الحد الأدني المسموح بيه، على خاطر موش ديما الأعوان في المطار باش يتساهلو معاك .. ووقتها تولي تخلّص عليه .
 

7- ما تردش بالك مالمواد السائلة:

العطورات والا كريمات كيفها كيف غيرها من المواد السائلة والقابلة للسكب تنجم تتسببلك في مشكلة وقتلي حاجة منهم تتحل والا تتكسر .. فلازمك تتأكد من أنك عرفت تحطهم في الحقيبة متاعك بالشكل الصحيح وعزلتهم على بقية الدبش. وهكا تكون حميت دبشك واللي موجود في الحقيبة لكل. 
 

8- ما تقراش حساب ''التحريشة'' ! : 

 نهار السفر في العادة مايكونش نهار مريح برشا بحكم الطاقة الى تستهلكها ملي تبدى وانت تخمم فماش حاجة خليتها والا قضية نسيت ماقضيتهاش لين توصل للمطار  .. 


وقتها كان كملت إجراءاتك الكل، وقعدت تستنى في الطيارة اللي قصيت تسكرتك عليها تجيك .. وقعدت تستنى، (بما أنو التأخير لازم منو عند بعض شركات الطيران) .. أكيد باش تجوع. مالا اذا كانك تتبع في نظام غذائي خاص والا تخاف انك تجرب ماكلة ماتعرفهاش في المطار اللي انت فيه وتتجنب العواقب .. ما تنساش باش تقرا حساب حاجة خفيفة مالحاجات المسموح بيها واللي تنجم تهزها معاك 

9- تنسى "الكادوات" ..  !

الشوكولا والحلويات والهدايا بصفة عامة تصبح مرحلة مهمة والتذكير بيها لازم أثناء تحضير حقيبة السفر وقت يتعلق الامر بمسافر تونسي جاي مالخارج .. وبما انو حق مكتسب للصغار الي عندك في العايلة، وحتى الكبار زادة .. لذلك الأمر يصبح ضروري وما لازمكش تنساه. اذا كان عندك حد وعدتو بحاجة تأكد انك حطيتها .. ومادمك صرفت، تنجم زادة فرد مرة تقرى حساب أي حد يخمم "يسرقك" في المطار، وذلك لتجنب حدوث أي مفاجأت (اللي باش نوضحولكم كيفاش تنجموا تتفاداوهم) .. بالضبط كيما أختنا عملت:   
 


10- ما تقومش بتأمين الحقيبة ! 

للأسف تصير أحياناً بعض الاشكاليات في ما يخص الحقائب والأمتعة داخل المطارات، كيما تنجم الأمور تمشي بشكل جيد وفي اخر رحلتك تستلم الأمتعة متاعك كاملة .. ساعات تصير عمليات السرقة أو تغيير الأمتعة داخل المطارات والمسافر مايلقاش الحقيبة متاعو والا يلقاها تحلّت.. 

لذلك من المستحسن انو بعد ماكملت حضرت الحقيبة متاعك ماتنساش باش تأمنها. تنجم تقوم بتصويرها في شكلها النهائي، ومحتوياتها من الداخل. وتسجل محتوياتها في ورقة تخليها معاك، للمطالبة بحقك في التعويض في حال
تعرضت للسرقة. ومن المستحسن زادة انك تتكفل بعملية تغليفها بنفسك، وقتها تنجم تستعمل أي علامة تحدد بيها جوانب الحقيبة متاعك وتميزها باش تعرف اذا كانت تحلت والا مالقيتهاش في الوضعية اللي خليتها فيها ..
 


اتبع أيضاً تعليمات المطار واستفسر على الحاجات المحظورة باش تتجنب تحطها في الحقيبة إلي ناوي تعديها، لأنو في الحالة هذي يضطروا الموظفين للتفتيش وفتح الحقائب.

ومع الرجوع على جميع التفاصيل هاذي، هكا تنجم تكون ضمنت انك أتممت مرحلة تحضير حقيبتك كما يلزم، وما يبقالك كان انك تستمتع برحلتك .. 

 

كلمات مفتاحية


مقالات مشابهة

Nord Tunisien
Le Guide
الخميس 4 نوفمبر 2021 - 14:53

5 أماكن تستحق الزيارة في الشمال التونسي

Nord Tunisien
Le Guide
الأربعاء 3 نوفمبر 2021 - 16:20

5 أماكن تستحق الزيارة في الشمال التونسي